16 أكتوبر 2026 · 4 دقائق قراءة · الجزء 4
إزاي تختار مبرمج سيستم ERP أو CRM: 10 أسئلة
عشر أسئلة تسألها لأي مبرمج أو شركة قبل ما تتعاقد على سيستم ERP أو CRM، من الصلاحيات لحد مين يملك الكود والبيانات.
قبل ما تسأل عن السعر، اسأل عن تلات حاجات: هل المبرمج هيفهم طريقة شغل شركتك ويبني السيستم عليها، ولا هيفرض عليك طريقته؟ هل الصلاحيات بتحمي بياناتك من جوه قاعدة البيانات، ولا الشاشة بس هي اللي مخبياها؟ ومين اللي هيملك الكود والبيانات بعد التسليم؟ الإجابات على دول بتفرق أكتر من أي رقم في عرض السعر.
في مصر والخليج أغلب أصحاب الشركات بيقولوا "CRM" على أي سيستم داخلي: عملاء، مبيعات، مخازن، فواتير، مرتبات. مش مهم الاسم. المهم إن اللي هيبنيه يفهم الفرق بين سيستم بيتشاف حلو في العرض وسيستم شركتك هتشتغل عليه كل يوم. دي عشر أسئلة، ومع كل سؤال الإجابة الكويسة شكلها إيه، من أنظمة بنيتها وشغالة فعلا.
1. هتبدأ بفهم دورة الشغل عندنا؟
الإجابة الكويسة: أيوه، وقبل أي شاشة. في سيستم ZS Tech، شركة أنظمة منازل ذكية في القاهرة، دورة الشغل كانت: عميل، معاينة، عرض سعر، مشروع تركيب، أقساط بتتحصل. السيستم اتبنى على الدورة دي بالظبط، فكل مرحلة ليها مكان، والصفقة بتمشي فيها لحد آخر قسط.
2. هتبني قسم ورا قسم وأجربه على بيانات حقيقية؟
الإجابة الكويسة: أيوه. أخطر حاجة إنك تستلم سيستم كامل مرة واحدة بعد شهور وتكتشف إنه مش ماشي مع شغلك. البناء على مراحل بيخليك تستخدم كل قسم وتقول رأيك قبل ما اللي بعده يبدأ.
3. الصلاحيات هتبقى إزاي؟
الإجابة الكويسة: لكل موظف صلاحية على كل قسم لوحده: مش شايف، يشوف بس، أو يعدل. في ZS Tech الفني يقدر يعلم على مهام التركيب، بس ميقدرش يغير مرحلة الصفقة، وميشوفش التكلفة ولا هامش الربح خالص. الأدوار الثابتة (أدمن وموظف) بتبان كفاية في الأول، وبعدين كل موظف جديد بيبقى استثناء.
4. الصلاحيات دي في الشاشة بس، ولا في قاعدة البيانات؟
ده أهم سؤال في القائمة. لو الزرار مستخبي من الشاشة بس، البيانات نفسها لسه بتوصل للموبايل أو المتصفح، وأي حد فاهم شوية يقدر يشوفها. الإجابة الكويسة: قاعدة البيانات نفسها بترفض. في ZS Tech التكلفة والهامش بيرجعوا فاضيين من قاعدة البيانات لأي حد ملوش صلاحية الماليات، حتى لو طلبهم مباشرة.
5. هتتعامل مع الفلوس إزاي؟
الإجابة الكويسة: خطة الدفع حاجة، والفلوس اللي وصلت حاجة تانية. العميل بيدفع جزء من المقدم النهارده والباقي بعد أسبوع، كاش مع الفني أو تحويل أو إنستاباي. السيستم الكويس بيسجل كل دفعة بمبلغها وطريقتها والخزنة اللي دخلت فيها، ويقولك لوحده إيه اللي متأخر. لو الإجابة "هنعمل زرار اتدفع"، ده مش كفاية.
6. فيه سجل لكل تعديل؟
الإجابة الكويسة: أيوه، مين غير إيه وإمتى، وكان إيه وبقى إيه. في ZS Tech أي تعديل على العملاء والصفقات والأسعار والفلوس والصلاحيات بيتسجل لوحده. لما تسأل "مين غير الخصم على العرض ده؟" الإجابة بتطلع في ثانية.
7. هيشتغل بالعربي والإنجليزي؟
الإجابة الكويسة: أيوه، وكل مستخدم يختار لغته. في نظام Hessa Events كل موظف بيختار عربي أو إنجليزي والسيستم بيفتكره. وحتى لو الواجهة إنجليزي، أسماء العملاء والملاحظات بالعربي لازم تتكتب وتتعرض صح.
8. هتكتب اختبارات للحسابات والصلاحيات؟
الإجابة الكويسة: أيوه، والاختبارات بتدخل كمستخدمين حقيقيين. سيستم ZS Tech فيه 44 اختبار: حسابات الأسعار والضريبة والأقساط، وإن الفني فعلا مش شايف التكلفة، وإن المشروع ميتسلمش للعميل وفيه مهام لسه مخلصتش. الأخطاء في الفلوس بتبان متأخر وبتكلف كتير، والاختبارات بتمسكها بدري.
9. مين يملك الكود والبيانات، وهيتستضاف فين؟
الإجابة الكويسة: الكود والبيانات بتوعك، والحسابات (السيرفر وقاعدة البيانات والدومين) باسم شركتك من الأول. لو المبرمج اختفى بكرة، تقدر تكمل مع حد تاني من غير ما تبدأ من الصفر. اسأل الصراحة: لو حبيت أنقل السيستم، هستلم إيه؟
10. وبعد التسليم؟
الإجابة الكويسة: توثيق مكتوب لطريقة الشغل، ودعم لفترة واضحة، وطريقة متفق عليها للتعديلات. السيستم الحي بيتغير مع الشركة: Hessa مثلا بدأ حضور وانصراف ومرتبات، وبعدين اتضاف عليه قسم كامل لحملات واتساب.
طب ليه مش سيستم جاهز زي Odoo؟
الأنظمة الجاهزة الكبيرة اختيار ممتاز لو شغلك قريب من الشكل اللي هي مصممة عليه، وعندك حد يظبطها. السيستم المخصوص بيكسب لما شغلك مختلف: دورة بيع وتركيب، تسعير من كذا مورد بعملات مختلفة، صلاحيات دقيقة، أو ربط مع حاجات محددة. قارن بصراحة، وماتخليش حد يقنعك إن نوع واحد بس هو الصح لكل الناس.
التكلفة بتتحدد بإيه؟
عدد الأقسام اللي محتاجها، وتعقيد الحسابات عندك، وعدد المستخدمين ونوع صلاحياتهم، والربط مع أنظمة تانية (فاتورة إلكترونية، واتساب، متجر أونلاين). الأفضل تبدأ بالقسم اللي بيوجعك أكتر، وتكبر بعدين.
أسئلة بتتسأل كتير
بناء السيستم بياخد قد إيه؟
بيعتمد على عدد الأقسام والحسابات. الأهم إن أول قسم يشتغل بدري وتستخدمه، بدل ما تستنى السيستم كله.
ينفع أبدأ بقسم واحد؟
أيوه، وده الأفضل غالبا. ابدأ بالعملاء والمبيعات أو بالحضور والمرتبات، حسب اللي بيوجعك أكتر.
محتاج الفاتورة الإلكترونية جوه السيستم؟
لو شركتك مسجلة في المنظومة، أيوه. اقرأ السيستم محتاج إيه للفاتورة الإلكترونية.
لو بتدور على حد يبني سيستم شركتك، التفاصيل في صفحة سيستم CRM لإدارة العملاء والمبيعات وصفحة برنامج حسابات ومخازن. ولو محتاج سيستم موارد بشرية، اقرأ سيستم حضور وانصراف ومرتبات: لازم يعمل إيه؟.